Dǫkw’ǫǫ łǫ Whelaa

Louıs Wedawın: Whatı̀ gots’ǫ Behchokǫ̀ ts’ǫ̀ dokw’ǫǫ̀ łǫ whela, łǫ dı̀ı̀. Deh gà dǫkw’ǫǫ̀ whela wègoat’ı̨, tobàa k’e. Eyı̀ı wek’èts’ezǫ hǫt’e.

Dǫkw’ǫǫ̀ ts’ǫwhelaa sı̀ı wègoat’ı̨ hanı̀kǫ dǫkw’ǫǫ̀ deɂı̨ı̨̀ whelaa, edı̨ı̨̀ whela wegoat’ıı̨-le, tıa whehtǫ weɂı̨ı̨̀, goghoo wenı, gogha wègoat’ı̨ı̨-le eyı̀ı hanıı weghǫ ası̀ı k’èts’ezǫǫ̀-le. Amèe gıkw’ǫǫ̀ whelaa wek’èts’ezǫǫ̀-le. Dǫkw’ǫǫ̀ etǫ k’è whelaà-le sı̀ı gıgòt’ǫ whı̀le, etǫ k’è eyıts’ǫ tı̨lı k’è zǫ k’ets’edè t’à, xok’e eyıts’ǫ̀ ı̨mbè.

Dǫ eyıı̀-le gıkwe whaà gots’ǫ dǫ gıkw’ǫǫ̀ nèts’ele ı̨lè. Eyıt’à gonèk’e dǫkw’ǫǫ̀ łǫ k’è gòlaa. Wòhdaa jǫ whela eyıts’ǫ wòhdaa yeè whela. dǫkw’ǫǫ̀ łǫ dè k’e k’enı̀ı̨la. Dǫ gıxè k’ehokw’oo, t’ası̨̀ı̨̀ ts’ǫ̀ nageedèe, dǫkw’ǫǫ̀ dechı̨tǫ nagıatı̨ gıts’aɂı̨ whı̀le. Ats’ǫǫ̀ gıkw’ǫǫ̀ nègetı̨̀ ne.

Dǫłàı̨dèe gıkw’ǫǫ̀ nègele tł’àxǫǫ̀ gıts’àgedè-le, eyıts’ǫ eyı̀ı dǫkw’ǫǫ̀ whelaa sı̀ı dǫ wıızı̀ı gıaɂı̨ whı̀le. Eyıt’àhǫǫ goɂǫhdaà dıı hagedı, edı̨ı̨̀ gonı̨hbaà nàts’ehge k’èhots’ezǫ-le t’à dǫkw’ǫǫ̀ k’e nats’ete sǫnı gedı. Ɂǫhdah dıı hagedı, wek’èts’ezǫ ha nıı̀le eyıts’ǫ dǫkw’ǫǫ̀ whelaa nàts’ehzı̨̀ nıı̀le gedı.

Gocho hagedı, “Dǫkw’ǫǫ̀ whetǫ k’e nı̨hbàa nègehge wek’èts’ezǫ-le ekı̀ı hanı̀ dè k’e nats’ete.” Goɂǫhdaà hagedıı̀ agedı sǫnı. Hanıı dǫ sı̀ı sıı̀ ɂekw’ı agedı. Gotà, gotseè eyıts’ǫ gotsı̨ łǫ xo dè k’e nàgı̨ı̨dèe sı̀ı dıı hagenı̨ı̨dı̀, “Jǫ whagwe k’e hǫǫzı̨, jǫ dè goı̨tłoa k’e hǫǫzı̨, wek’e nı̨hbàa nàts’ııhge, jǫ nezı̨ı̨̀ ts’ete ha,” hagedı. Eyıt’à whagwe k’e agǫ̀ht’e ı̨lè, dè nezı̨ı̨ k’e ts’ı ats’ehɂı̨ eyıts’ǫ dè k’e wekw’ıhchı̨ı̨̀ xàts’et’à. Kw’ıchı̨ı̨̀ weka nı̨hbàa nàts’ehge goyı̀ı ts’eetè. Ɂǫhdah hanı̀ dè ghǫ gogede, “Whagwe k’e hǫǫzı̨ ekǫ nı̨hbàa nàts’ehge.”

Ɂǫhdah hagedı, “Įnèe gots’ǫ dǫkw’ǫǫ̀ whetǫ ı̨lè, whaà t’à whaà, dǫkw’ǫǫ̀ weka nı̨hbàa nàts’ı̨ı̨hgè eyı̀ı kò wek’èts’ezǫ ha nıı̀le.”