Jǫ ɂǫhdah wekw’ǫǫ̀ whetǫ hǫt’e. Dıı godıı̀ t’à ɂehtseè sexègodo. Ɂehtsèe hoònǫ daats’ǫ̀ weghoò ekò tı gǫ̀hłı̨-le agòdzà, wemǫǫ̀ dǫ hoònǫ geot’ı̨ı̨ xè wemǫǫ̀ nàgedè. Dǫ hoònǫ edèot’ı̨ xè nı̨hbàa ı̨łè yı̀ı nàgedè. Eyı̀ı xok’e bò dę degeèhdı̀ hanı̀ nı̨hbàa ı̨łè yı̀ı nàgedè. Tłı̨ wohdaa bò ełagı̨ı̨dè bò whı̀le t’à.

Dıı dǫzıa dètı̨ hadı, hotıı̀ chekoa hǫt’e. bò dę dètı̨. Whetı̨ ekò wetà yet’à tıts’aàdı̀ı nechàa nàzèe gha wet’à eghàlats’edaa wets’ǫ, dedı̀ı lanıı. Dǫzıa whetı̨, nàwhetı̨ t’à tı nàke wegha wègoat’ı̨ wek’e dedı̀ı nàke nàłewo.

Dǫzıa ts’ı̨ı̨wo ekò edetà wets’ǫ wet’à eghàladaa yet’à dedı̀ı gha nàze neyı̨ı̨̀wa, Wet’à eghàlats’edaa nıı̀wa gà whatsǫ xàèhtła. Edèot’ı̨ ts’ıgǫ̀ǫhwho-le. Wet’à eghalats’edaa neyı̨ı̨̀wa, tı nàke ts’ǫ̀ naèhtła. Nàwhetı̨ gots’ǫ dedı̀ı sı̀ı yaɂı̨. Eyı̀ı dedı̀ı nàke ełagòı̨hdè. Ekı̀ı chekaa elı̨ ne t’à dedı̀ıkwǫ̀ k’e łaèht’àa k’èezǫǫ̀-le. Dejı̨, wèot’ı̨ wets’ǫ̀ gı̀ts’è ha nı̀wǫ t’à. Edzaà ı̨łè xàı̨ht’a, gogeèhk’ǫ̀ǫ k’è ts’ǫ̀ nayeèchı̀. Gogeèhk’ǫ̀ǫ k’è dǫ hazǫǫ̀ ts’egı̨ı̨dè. Dǫzı̀a wıı̀le nǫǫ̀. Wemǫ, wetà degeèhyeh gızaa whı̀le t’à. Dǫ hazǫǫ̀ nı̨hbàa wemǫǫ̀ wehak’egeet’ı̨̀. We ha yagı̀zeh. Nıı̀là, dǫzı̀a dechı̨nı gots’ǫ dedı̀ıdzaà eyıts’ǫ wet’à eghàlats’edaa wetà yèhtsı̨ı̨ xè naetła gıaɂı̨. Edetà gà nı̀ı̀tła, dǫ hazǫǫ̀ gıaɂı̨ı̨̀ ekò gıxè ts’èwhı̨ı̨̀ agòdzà. Edetà ts’ǫ̀ èhtła ekò do gınà nàhòwo, behkà eyıts’ǫ wet’à dedı̀ı gha nàzèe detà nadą nèyı̀ı̀wa eyıts’ǫ edzaà wetà gà wetł’akw’oò.

Wetà hadı, “Edı̨ı̨̀ gots’ǫ edzaà anelà?” yèhdı. Tı k’e dedı̀ı nàke ghǫ nàwhetı̨ edetà ts’ǫ̀ hadı. Eyıt’à nıı̀tła gà xàèhtła eyıts’ǫ dedı̀ı nàke whehk’è. Hanı̀kò dàanı̀ bo k’ets’et’à k’èezǫ-le, eyıt’à edzaà zǫ xàı̨ht’a wets’ǫ̀ gı̀ts’e ha-le t’à. Hazǫǫ̀ gınà nàhòwo, eyı xo k’e dedı̀ı nàke t’à dǫ edaxàgoı̨la. Hanı̀t’a chekoa elı̨ı̨̀ ekò wets’ǫ̀ hoedı xèhoı̨̀wo. Wıı̀le gots’ǫ̀ hanı̀ wegodıı̀ wheɂǫ. Ełaı̨wo tł’axǫǫ̀ kò wegodıı̀ ı̨łaà wheɂǫ. Jǫ nèts’edè nı̨dè wegha yats’ehtı eyıts’ǫ ası̀ı wets’àts’ehdı̀ nı̨dè goèhkw’ǫ ha sǫnı, jǫ wekw’ǫǫ̀ whetǫ k’è ats’ı̨ı̨là nı̨dè. Eyı̀ı dǫ jǫ wekw’ǫǫ̀ whetǫǫ sı̀ı wegodıı̀ wenı̨htł’è ı̨łè zǫ t’à naxıxè gohdoò aehsı̨. Dǫ ı̨nı̀ k’ę̀ę̀ dǫ gha k’àowo elı̨, jǫ dǫ gha wıızı̀ nechàa elı̨.

Dǫkw’ǫǫ̀ whelaa dıı hanı̀ wègoat’ı̨, ts’ı dııyeè ts’ǫ̀ dehshe, ts’ı dàtłǫ weghoǫ eyıts’ǫ dàı̨hcho wegots’ı̀hɂà ha-le. Dıı ts’ı haàtłǫ weghoò ts’edı ha dı̀ı̀-le eyıts’ǫ wemǫǫ̀ dıı hanıı nàdaatł’ı̀. Xo taàt’eè jǫ nǫǫ̀gedè, sııgogehɂı̨ eyıts’ǫ dıı hanıı hazǫǫ̀ negıı̀wa. Dǫ jǫ nàgedè, xagoget’à, xàgogeèhk’ǫ̀. Jǫ ełègehdè, mòht’a sègetı̨, eyıtł’axǫǫ̀ nageedè. Įłè xo ı̨łàà haget’ı̨ ı̨lè. Hoɂı̀ı ı̨̨łaà jǫ haget’ı̨. Setseè hagedıı̀ sexè gogedo ı̨lè, eyı̀ı nı̨htł’è dakwełǫ̀ǫ̀ k’e dek’eèhtł’è. Nezı̨ı̨, Ehkw’ı Wheɂǫ.