Deh K’è Geeɂè

Jonas Nıtsıza: Tsà eyıts’ǫ dhagı̨ı̨wǫ tł’axǫǫ̀ nı̨dè elà t’à Behchokǫ̀ ts’ǫ̀ geedè. Chekoa ɂehłı̨ ekò gıxè ahdzà ı̨lè. Dehk’è gıxè ahdzà, ełek’èdaa elà hote nats’ele.

Hote ts’eedè nı̨dè ası̀ı k’ehłe ha dı̀ı̀ ekı̀ı t’oò nàk zǫ. Hanı̀t’aa setà k’è k’ehtło. Nàı̨lı̨ı̨ nechàa ghǫ nèts’ı̨ı̨dè ekò dǫ łǫ łets’àgedı, elà hote nageele. Hanı̀ eghàlageda ı̨lè. Ayı̀ı gıts’ǫǫ sı̀ı t’à k’egedè ı̨lè, hanı̀ ı̨lè.

Dǫ xè ats’et’ı̀ t’à goı̨nà ı̨lè. Weghǫsets’ezee gǫ̀hłı̨, gǫ̀łı̨-le, dǫ łexè aget’ı̨ t’à ats’ǫǫ̀ gınà. Deh naghoa xè nedèe k’è dǫ xàgogeèk’ǫ̀ kè gòlaa, dǫ łǫ eyı̀ı nàgedè, deh k’è ets’agòɂà haı̨wa ts’ǫ̀ tabàa k’e nı̨hbàa łǫ nàwheɂa.

Dǫ wòhdaa goxè geède, ı̨daà xàgogeèhk’ǫ̀ǫ k’e do łǫ nàdè. Dǫ gıgà ekǫ k’achı̨ ts’eète, eyıts’ǫ dǫ gıts’àts’edı ha gı̨ı̨wǫǫ sı̀ı ts’àts’edı.

Dǫzhı̀ı wòhdaa tsà eyıts’ǫ dzǫ detłòò k’egele. Gogeèhk’ǫǫ k’è ts’èko tsàwo eyıts’ǫ dzǫwò sıı̀gehɂı̨ eyıts’ǫ wha k’e gehgǫ, k’egedè kò.

Nàgezèe dǫǫ̀ dehk’è geeɂè nı̨dè tsà eyıts’ǫ dzǫ ełagehde. Dzǫwò eyıts’ǫ tsàwò detłòo t’à ts’èko sıı̀gehɂı̨ eyıts’ǫ gehgǫ t’à gots’àgedı. Ts’èko łǫ ełets’àgedı. Ekı̀yeè k’e dǫ ełets’àgedı ı̨lè. Sı̀ weghàıhda ne t’à dıı wegodıı̀ t’à naxıxè gohdo.